भारतीय सटोरिया संघ की प्रधान मंत्री से अपील

गढ़वाली हास्य -व्यंग्य 

 सौज सौज मा मजाक मसखरी 

   हौंस,चबोड़,चखन्यौ    
    सौज सौज मा गंभीर चर्चा ,छ्वीं  

                        भारतीय  सटोरिया संघ की  प्रधान मंत्री से अपील

                               चबोड़्या - चखन्यौर्या: भीष्म कुकरेती
(s = आधी अ )


आदरणीय प्रधानमंत्री अर सबि भारतीय !
                       अचकाल अखबार अर टीवी माध्यम हम सटोरिया अर हमर पाक, साफ़ अर दुबईमय, सबि भारितियोन कुण सुलभ व्यापार का बारा मा अनावश्यक, अनाप सनाप , अनर्गल भ्रान्ति फैलाणा छन। चूंकि अबि अबि जु द्वी चार क्रिकेटर पकड़े गेन वां से यूँ पत्रकारों तैं लग कि हमर पवित्र , इमानदारी से भरपूर , हिसाब किताब मा सही व्यापार मा कमी ऐ ग्याइ। हम यीं अपील से सबि भारतीयों तैं आगाह करदवाँ कि राजनीतीग्यों तरां जनता से कट्यां  यूँ  पत्रकारों भकलौण/बहकावा  मा नि ऐन। हमर क्रिकेट , राजनीति अर अन्य खेलों पर आधारित सट्टा बजार  बड़ा जोरूं से चलणु च उल्टां जौं तैं बि नि पता छौ कि  बौलर की हरेक बौल पर सट्टा लगाये जै सक्यांद वूँ तैं बि पता चलि गे अर यूँ दिनु हमर शुभ्र, धर्म प्रिय सट्टा बजार माँ हजार गुणा इजाफा ह्वे ग्याई।

                  आदरणीय प्रधान मंत्री जी ! हम पर अभियोग लगाये जांद कि हम क्रिकेटरों तैं पटैक वूंका इस्तेमाल करदवाँ। हमर मानण  च बल कि भारत एक प्रजातन्त्री देस च अर इख बेईमानी, देस की जनता का दिलों से खिलवाड़ , देस तै धोका दीण मा एकाधिकार कतै नि होण चयेंद। हमर मानण च बल देस तै लूटिक अपण घौर भरण पर खाली राजनीतिज्ञों अर सरकारी कारिंदों एकाधिकार नि होण चयेंद। हमर सट्टाबजार नेताओं अर अधिकारियों की लूट खसोट को एकाधिकार खतम करणों सबसे बेहतर, उत्तम नही सर्वोत्तम जरिया च। हम आम भारतीय जन चन्डेला, चौहान, अमित सिंह, आदि खिलाड़ियूँ तैं   मौक़ा दींदा कि वो बंगरप्पा , जया जेटली, सुरेश कलमाड़ी, ए राजा, यदुरप्पा, रेडी ब्रदर्स   अर समस्त टेलीकॉम उद्योगपतियों जौन  गलादारी कार का पदचिन्हों पर चलिक ये भारत को बैंड बजावन।

                 प्रधान मंत्री जी हम तैं आपकी पार्टी को दिग्विजय  सिंह से बड़ी शिकायत च ऊँन एक बयान दे बल सट्टा बज़ार से जुड्या क्रिकेट खिलाड्यूं पर आजीवन बैन लगण चयेंद। प्रधान मंत्री जी ! जरा द्याखो त सै कि तुमर पार्टी को महासचिव की शरम ल्याज बि हरची गे। अरे जब कौंग्रेस गलादार नेताओं पर एक दिन को बैन नि लगांदी त यूँ क्रिकेटरों पर बैन किलै? जब मैच फिक्सिंग को   लाँछनधारी अज्जरुद्दीन तैं कौंग्रेस अपण एमपी बणै सकदी त प्रधान मंत्री जी ! यूँ क्रिकेटरों पर  बैन की बात करण कखाको न्याय च ?

   प्रधान मंत्री जी ! फिर यी पत्रकार  हमर परम पूज्यनीय, प्रात: स्मरणीय सट्टा किंग मेकर श्री श्री दाउद  की खुले आम तौहीन करदन। भारत मा एक नियम च बल दुसर धरम गुरु का बारा मा गलत शब्दों इस्तेमाल नि करी सकदन। हम बिलंच सटोरियों, बुक्कियों  धर्म गुरु
दाउद जी छन। सब तैं अपण धरम गुरु से प्यार होंद। यो बताणो जरूरत नी च बल धरम गुरु की बेज्जतीs  बदला लीणो बान इतिहास मा हजारों दें  कत्लेआम ह्वेन। हमर धर्म अर शिक्षा गुरु दाउद इब्राहिम का बारा मा जू बि पत्रकार अब कुछ अंट संट ब्वालल तो ल्वैखतरी होलि तो हमर असली धरम सट्टाबजार पर लांछन या भगार नि लगैन हाँ!
   अर फिर यी पत्रकार लोग हमारी पवित्र , पाक, दुबई केन्द्रित, कराची संचालित- डी कम्पनी द्वारा हवाला की बात फोकट मा करणा छन। हमर बुलण च बल आइपीएल क कथगा इ फ्रैंचाइजी को हवाला द्वारा भारत मा पैसा लाण-लिजाणै  सबि फ़ाइल इन्फोर्समेंट, इनकम टैक्स अर फोरें मनी डाईरेक्ट्रेट  मा पड़ी छन। दक्षिण अफ्रीका मा जो आईपीएल का मैच ह्वै छया वांकी छांट निराळ कारो त  सै। सरकारी अर गैर सरकारी स्तर पर यूँ सफेदपोश व्यापारियों काळो  धंधा की पोल  ख्वालो  त सै त पैल्या कि हमारा महामहिम दाउद इब्राहिम का कारनमा यूँ सफेदपोश गलादारों समिण कुछ बि नी च।
 प्रधान मंत्री जी ठीक च आप तो मौनी बाबा छन। पण यो तो आप बि जाणदन बल भौत सालों से भारत बिटेन ब्लैक मनी स्विस बैंको मा जाणो च त जरा ये ब्लैक मनी को जाण रुकवावो त सै फिर हम सटोरिया अफिक अपण धंधा बंद करी द्योला।
   प्रधान मंत्री जी ! जन राजा तन प्रजा ! जरा अपण दिग्विजय सिंह जी तै समझावो बल यदि शीर्सस्थ नेतृत्व पाक , पवित्र अर स्वच्छ आचरण अपनावो त प्रजा, व्यापारी बि स्वच्छ आचरण का रस्ता पर चौलल। पण जय देस का शीर्षस्थ हे दागदार होलु उख हम सरीखा देस खावो सटोरिया ही पैदा ह्वाल!
आपकु अपुण , अपणैसि माँ  
सटोरिया संघ  


Copyright @ Bhishma Kukreti  20/05/2013           
(लेख सर्वथा काल्पनिक  है )


--

 

 

 

 

Regards
Bhishma  Kukreti